Arbitri nga Polonia Simon Marçiniak drejtoi finalen e madhe mes Argjentinës dhe Francës, ku këta të fundit humbën me penallti. Por francezët kanë sulmuar arbitrin duke e akuzuar se nuk gjykoi në mënyrën më të mirë. Përballë këtyre sulmeve, Marçiniak doli në konferencë për mediat.
Ai sqaroi polemikat përsa i përket golit të 3-të të Argjentinës, i cili sipas “Gjelave” duhet të anulohej për shkak të disa lojtarëve dhe pjesëtareve stafi në fushën e lojës kur Mesi goditi topin.
“Së pari, kjo situatë për të qenë e dënueshme duhet të kushtëzojë lojën. Çfarë ndikimi patën rezervat që u ngritën nga stoli dhe hynë në fushë? Ata kërkojnë justifikime, janë gazetat serioze dhe ata që kërkojnë klikime. Ndër të tjera, francezët nuk kanë përmendur foton ku shihet se janë shtatë lojtarë nga stoli që futen në fushë kur Mbape shënon golin e rezultatit 3-3”, tha ai.
