Antipatia mes Mauro Icardi dhe Maxi Lopez qëndron në fije të perit, apo më saktë, në pëlqimet e Instagram. Ish-bashkëshorit i Wanda Nara, sot te Udinese, ka thumbuar kapitenin e Inter me një “like” ndaj batutës së publikuar në Instagram: “Macja që ka pushtuar fushën në ndeshjen Besiktas-Bayern Munich, ka regjistruar më shumë prezenca në Champions League, se Icardi”. Një batutë kjo që ka ngjallur menjëherë pëlqimin e Maxi Lopez, i cili, i zbarkuar prej vetëm pak kohësh në Instagram, i ka bërë menjëherë “like” fotos dhe diçiturës së publikuar.
Besiktas është duke u hetuar nga UEFA pasi një mace përshkoi të gjithë fushën e futbollit gjatë ndeshjes ndaj Bayern Munich, e vlefshme për takimin e dytë të të tetave të Champions League. Arbitri anglez, Michael Oliver ndali lojën në pjesën e dytë në “Vodafone Park”, deri sa macja të largohej nga fusha. Akuza e saktë është “organizim i paplotë”, ndërkohë që klubi turk u akuzua gjithashtu për “hedhje të objekteve dhe bllokimin e shkallëve”. Çështja do të shqyrtohet nga trupa disiplinore e UEFA-s në 31 maj. Bayern fitoi 3-1 në Turqi, për tu kualifikuar për në çerekfinale, me një fitore akumulative në shifrat 8-1, ndërsa tifozët e klubit gjerman, vlerësuan macen si futbollistin më të mirë të ndeshjes.
