Në shtëpinë e Milanit është dita e Ruben Loftus-Cheek. Anglezi zbarkoi këtë të enjte në Milano ku iu nënshtrua vizitave mjekësore për të firmosur më pas një kontratë deri në 2028. Kartoni i tij i kushtoi Milanit 21 milionë euro dhe është dhurata e parë për Stefano Piolit. Sigurisht kjo nuk është lëvizja e fundit, drejtuesit e klubit kuqezi kanë në dispozicion 35 milionë euro buxhet, pa përfshirë këtu një pjesë të parave që do të përfitojnë nga shitja e Sandro Tonalit.
Nga Chelsea pritet të vijë edhe Pulisic, është ai objektivi i radhës i rëndësishëm. Milan dhe Fiorentina pritet të përfshihen gjithashtu në një shkëmbim lojtarësh, Rebic për Jovic. Me një repart ofensiv të vjetër në moshë, objektivi i klubit është të gjej në treg një tjetër sulmues. Emrat në tavolinë janë të ndryshëm nga Scamacca dhe Morata, ndërsa pista Icardi, e lakuar pak ditë më parë, thuajse ka rënë përfundimisht pasi argjentinasi përfiton 10 milionë euro në sezon.
