Mbrojtësi i Kombëtares, Marash Kumbulla, foli në konferencë për shtyp, në prag të ndeshjes miqësore me Gjibraltarin.
Futbollisti kuqezi u pyet për largimin e Adrian Bajramit te Zvicra, ndërsa tha se secili lojtar bën zgjedhjet e veta. Ndër të tjera ai theksoi se ekipi ka punuar për të përmirësuar gabimet e bëra në ndeshjet e tjera.
“Ekipi është mirë. Secili bën zgjedhjet e veta. Ne mendojmë më shumë për veten dhe për grupin që jemi këtu. Nuk do mendojmë asgjë për lojtarët që bëjnë zgjedhje tjetër.
I kemi parë videot e ndeshjeve për gabimet që kemi bërë. Duhet të përmirësojmë gabimet. Kemi punuar. E kemi mendjen te Gjibraltari dhe të shikojmë për ndeshjen me Letoninë.
Unë jam gati gjithmonë për Shqipërinë. Kombëtarja është e para e të gjithëve. Çdo lojtar dëshiron të luajë për Kombëtaren”, u shpreh Kumbulla.
