Spanja do të luajë të martën kundër Argjentinës, por pyetjet më të mëdha për trajneri Julen Lopetegui kanë pasur lidhje me lojtarët që ai do të grumbullojë për Kupën e Botës dhe për aktivizimin e pakët të Isco-s me Real Madrid.
Fantazisti ka luajtur nga minuta e parë kundër Gjermanisë, duke bërë një paraqitje shumë të mirë. “Isco është një lojtar i rëndësishëm për kombëtaren”, ka thënë Lopetegui për “Radio Maraca”. “Është shumë e rëndësishme që ai të luajë, por nuk mund të gjykoj vendimet që merr një koleg i imi”.
Në lidhje me lojtarët që do të grumbullohen për Kupën e Botës, tekniku i Spanjës ka bërë të ditur se nuk ka vendosur akoma. “Kam një ide për ekipin e Kupës së Botës, por nuk është përfundimtare. Ka lojtarë që kanë akoma një mundësi, edhe pse nuk janë grumbulluar këtë herë. Nuk dua t’i mbyll derën Javi Martinez-it apo të tjerëve”.
Cilido që të jetë pjesë e listës së 23 lojtarëve, Spanja konsiderohet një nga përfaqësueset favorite për të fituar në Rusi. “Ne duhet të jemi të përulur dhe të shkojmë atje duke e ditur se jemi mes ekipeve favorite”, ka thënë Lopetegui. “Duhet të fitojmë me stilin tonë të lojës në çdo ndeshje”.