Belgjika nuk do të ketë në radhët e saj dy qendërmbrojtësit Thomas Vermaelen dhe Vincent Kompany për ndeshjen e parë të Kupës së Botës, të hënën kundër Panama.
Trajneri Roberto Martinez pranoi se asnjë nga dy futbollistët e lartpërmendur nuk janë në gjendje për të luajtur në takimin e Grupit G në Sochi, por do të vazhdojnë të jenë pjesë e skuadrës për pjesën tjetër të Kupës së Botës në Rusi.
“Thomas Vermaelen ka patur një përmirësim të ndjeshëm të formës së tij, por nuk do të rrezikojmë në aktivizonin e tij kundër Panamasë, për ta pasur të gatshëm për dy ndeshjet e ardhshme të grupit,” – tha Martinez.
Në lidhje me gjendjen e kapitenit të Manchester City, Kompany ai shtoi: “Në krahasim me momentin kur u dëmtua ndaj Portugalisë, Kompany është shumë më mirë, por nuk do të luajë në ndeshjen kundër Panamasë. Ai po punon për të luajtur në ndeshjen e fundit të grupit ndaj Anglisë dhe mjekët më kanë dhënë garanci për këtë.”
