Java e 20-të e Premier League ofron sot një duel shumë interesant. Në St James Park, Newcastle United pret skuadrën e rekordeve, Manchester City-in e Pep Guardiolës. Nga njëri krah është Rafa Benitez i cili në këtë sezon ka një mision të vështirë të mbajë qymyrxhinjtë mes më të mirëve të futbollit anglez.
Ndërsa në anën tjetër është Pep Guardiola trajneri që i ka dhënë një tjetër dimension Manchester City dhe i ka bërë Citiziens një nga skuadrat më të mira në Europë dhe që luajnë një futboll spektakolar. Objektivi i City-it është të thyejë rekordin e Bayernit prej 19 fitoresh radhazi në kampionat, por për ta realizuar këtë mision skuadra nga Etihaad Stadium duhet të kalojë më parë Newcastle-in për ta çuar në 18 numrin e fitoreve rresht.
Me një sukses të mundshëm mbrëmjen e sotme skuadra e Guardiolës do të hidhte një tjetër hap të sigurtë drejt titullit kampion pasi diferenca me Manchester United të vendit të dytë do të shkonte në plot 15 pikë.
