James Rodriguez analizoi pjesën e tij të parë të sezonit me Bayern Munich, në një intervistë me “Sport1”.
Kolumbiani ka përfunduar tashmë gjysmën e vitit të parë nga dy të tillë, sa është huazuar nga Real Madridi në Gjermani, dhe ka deklaruar se shpreson që aventura e tij bavareze nuk do të përfundojë në vitin 2019.
“Bayern Munich është një klub i madh, prandaj mund të imagjinoj të luaj këtu për shumë vite të tjera”, – tha James për kohën e tij në “Allianz Arena”.
Përveç kësaj, ai theksoi se nuk gjen shumë ndryshime midis klubit të tij të mëparshëm dhe atij të ri: “Bayerni është në të njëjtin nivel me Real Madridin, një klub i kalibrit më të lartë, që gjithmonë lufton për të fituar tituj, i ka arritur ato. Për mua, Bayern Munich është një klub i nivelit më të lartë”.
Lidhur me aklimatizimin e tij në qytet, kolumbiani shtoi: “Më pëlqen Mynihu shumë, është pak i ftohtë, por jam adaptuar mire. Për mua kjo është një jetë e re, por Mynihu është një qytet fantastik”.