Jose Mourinho është aq i fiksuar pas perfeksionit, saqë gjatë kohës kur ishte te Real Madrid ai ndryshonte këpucët që vishnin futbollistët. Sekretin e ka zbuluar ish-zëvendësi i tij, Aitor Karanka. Ish-trajneri i Middlesbrough punoi nën drejtimin e Mourinhos te “Los Blancos”, si asistent i portugezit në Bernabeu për periudhën 2010-2013. “Jose ka gjithçka të imagjinueshme nën kontrroll, që nga bari në fushën stërvitore, deri te këpucët që vishnin futbollistët.
Provonim kostumet e udhëtimit të skuadrës dhe këpucët. Real Madrid kishte një markë këpucësh, por nuk ishte marka më e mirë. Jose u përball me personin përgjegjës në klub dhe i tha: ‘Ah futbollistët përdorin këtë markë këpucësh në jetën e tyre normale? Jo, nuk mendoj ashtu. Si mund të përdorin ata këtë mark këpucësh para ndeshjes, kur janë mësuar me marka të tjera?’. Jose mendonte për këpucët në mënyrë që futbollistët të ishin rehat përpara ndeshjes”, deklaroi Karanka për “The Times”.
“Ai mendon për gjithçka. Madje edhe për mua, një asistent, më duhej të vendosja çdo piramidë në pozicionin e duhur dhe çdo vërshëllimë në kohën e duhur. Ai është gjithmonë kërkues ndaj trajnerit të portierëve, trajnerit të aerobisë, meje dhe futbollistëve. Ai kërkon çdonjërin rreth skuadrës të jetë tërësisht i përqëndruar në punë. Jose është njëlloj si Conte, si Pep, si Arsene dhe Jurgen.
Personalitete të ndryshme, cilësi të ndryshme, stile të ndryshme, por të gjithë ata duan të fitojnë. Futbolli dhe jeta konsistojnë te fitroja. Ishte mirë për Jose kur mbërriti te Real Madrid, që kishte Guardiolan te Barcelona, për shkak të sfidës dhe konkurencës. Tani është mirë për Jose që Pep është te Manchester City. Konkurenca është pozitive”
“95% të ditës, Jose është gazmor, ndërsa 5% tjetër thjeshtë është me mediat. Kur bashkëshortja ime u takua me Jose, u surprizua. Ai nuk ishte personi që ajo ishte mësuar të shihte nga televizori. Ai ishte gallatë, një baba shumë i mirë, mik shumë i mirë. Ai është shumë besnik. Në rastin tim, ai më përçoi të gjithë vetëbesimin e tij dhe unë i dhashë më të mirën time”, përfundoi Karanka rrëfimin e tij për pjesën e errët të portugezit, Jose Mourinho.
