Getafe, këtë të premte, do të provojë t’i japë vazhdimësi formës së mirë që ka treguar në “Coliseum Alfonso Perez”. “Azulones” kanë qenë pothuajse perfekt përpara publikut vendas kohët e fundit duke marrë katër fitore dhe një barazim në pesë ndeshjet e fundit të kampionatit që kanë luajtur në shtëpi.
Për më tepër, ata kanë pësuar vetëm një gol në këto takime. Gjithsesi, nuk do të jetë aspak e lehtë për ata që ta vazhdojnë këtë formë të mirë kundër një skuadre si Athletic Bilbao, duke parë se edhe miqtë e kanë rritur nivelin e lojës së tyre. Edhe bardhekuqtë kanë qenë të vështirë për t’u mposhtur në javët e fundit dhe do të paraqiten në këtë sfidë të pamposhtur në 7 ndeshjet e fundit të luajtura në të gjitha kompeticionet.
Një fitore në “Coliseum” do t’i jete mundësinë Bilbao-s ta parakalonte Getafe-n në renditje, duke parë se vendasit kanë vetëm një pikë avantazh ndaj miqve në renditje. Për sa i takon përballjeve direkte, baskët kanë marrë gjashtë fitore dhe një barazim në shtatë ndeshjet e fundit të luajtura kundër Getafe-s.