50 milionë euro, kaq duhet të paguajë Liverpooli nëse e dëshiron Alisson Beckerin në “Anfield”.
Roma ia ka bërë me dije Liverpoolit se portieri i saj, Alisson Becker, nuk do të largohet nga kryeqyteti italian për më pak se 50 milionë euro gjatë kësaj vere, raporton e përditshmja spanjolle “Marca”, transmeton Gazeta Express.
Alisson, i cili iu bashkua Romës për 8 milionë euro në vitin 2016, është zbulimi i këtij sezoni në Serie A dhe falë performancave të tij shumë klube evropiane kanë shprehur interesim për të, përfshirë Liverpoolin dhe PSG-në.
Roma, e cila është në dijeni se lista e klubeve të interesuara për përfaqësuesin brazilian është duke u rritur, ka nevojë të mbledhë të hyra dhe do ta vërë në listën e shitjeve gjatë verës.
Megjithatë, klubi nga kryeqyteti italian nuk do të pranojë asnjë ofertë nën 50 milionë euro.