Megjithëse ende asgjë nuk është zyrtare, Arsenal duket se po bën goditjen në orët e fundit të merkatos së janarit. Bëhet fjalë për sulmuesin Pierr Emerik Aubamejang i cili sot ka lënë aeroportin e Dortmundit dhe është nisur drejt Londrës.
Sipas asaj që raporton gazeta angleze “The Sun”, ky operacion i ka kushtuar Arsenalit 55 milionë paund duke siguruar një pagë prej 180 mijë paund në javë në Londër.
Lajmi është pritur mirë nga tifozët e “topçinjve” të cilët kanë nisur të personalizojnë edhe bluzat e para me mbiemrin e sulmuesit, të cilit i kanë vënë dhe numrin 14, i cili më parë është mbajtur nga legjenda Tierri Henri.
Aubamejang është pjesë e Borusia Dortmund që nga viti 2013, duke u bërë menjëherë një titullar fiks në radhët e kësaj skuadre. Por problemet jashtë fushës së lojës dhe çështjet disiplinore zbehën lidhjen e tij me klubin, duke kërkuar tashmë fillimin e një aventure të re larg Gjermanisë.
Sulmuesi mendohej se do të përfundonte te Liverpuli, por trajneri Jurgen Klop e cilësoi të panevojshëm afrimin e tij, duke i hapur rrugë transferimit të Aubamejang te Arsenali.
