Danilo Alves është një nga më të vjetrit në ekip dhe fjala e tij ashtu si ajo e kapitenit Busic dhe mbrojtësit Veliu ka peshë tek shokët e skuadrës. Vetë 27-vjeçari tregon gjendjen e skuadrës duke bërë dhe një analizë të ecurisë së saj.
“Kam folur me të gjithë shokët e skuadrës dhe janë të përqendruar për këtë ndeshje. Shpresojmë të bëjmë një ndeshje të mirë dhe të fitojmë, për të arritur këtë duhet të japim maksimumin si skuadër. Ekipi po luan mirë ndërkohë që personalisht jam i lumtur për golat dhe shpresoj të shënoj edhe ndaj Skënderbeut si dhe në vijim pasi këtë edicion kam shënuar shumë pak për skuadrën”.
Flamurtari është skuadra rekord përsa i përket barazimeve këtë sezon me 8 rezultate të tilla. Danilo Alves ka idetë e qarta për rezultatin që i duhet në këtë 90 minutësh të rëndësishëm.
“Shpresojmë ta kalojmë me rezultat pozitiv këtë ndeshje. Nuk duhet të pësojmë gol dhe të mos humbasim. Do japim maksimumin dhe shpresoj të fitojmë 1-0”.
Në fund një fjali për të treguar karikimin që ka kapluar ambientin në Vlorë, por mbi të gjitha për të çuar optimizmin edhe tek publiku vendas.
“Jam optimist, fitojmë 1-0 me gol të Danilo Alves. Forca Flamurtari”.