Një delegacion i Federatës Norvegjeze të Futbollit ka vizituar ditët e fundit ambientet e stadiumit “Elbasan Arena”.
Vizita e zyrtarëve norvegjezë ka ardhur për shkak të miqësores që do zhvillohet në datën 26 mars mes Shqipërisë dhe Norvegjisë.
Një vizitë kjo për të parë gjendjen e stadiumit në Elbasan dhe se në çfarë kushtesh do pritet Kombëtarja e tyre në Shqipëri.
Por norvegjezët nuk i kanë shpëtuar mikpritjes së stafit të stadiumit me në krye Xhevdet Muzhaqi, i cili është edhe drejtori i stadiumit.
Ata e kanë pranuar me kënaqësi një ftesë për të pirë një kafe dhe një gotë raki ashtu siç e do zakoni në vendin tonë.
Përfaqësuesit norvegjezë duket se e kanë vlerësuar shumë mikpritjen nga drejtuesit e stadiumit dhe kanë dalë shumë të kënaqur nga vizita e tyre në Elbasan.