Thiago Alcantara mund të kthehet përpara parashikimeve nga lëndimet e tij muskulare, sipas trajnerit të Bayern Munich, Jupp Heynckes. Mesfushori spanjoll u largua i dëmtuar nga fitorja 2-1 e Bayernit kundër Anderlechtit në Ligën e Kampionëve, në nëntor të vitit të kaluar, dhe nuk është paraqitur në fushë nga ajo kohë.
Një diagnozë e saktë e problemit të tij nuk u zbulua kurrë nga udhëheqësit e Bundesligës, por Heynckes tani shpreson se 26-vjeçari do të jetë gati të shfaqet përsëri, së shpejti, pasi ka bërë hapa të mirë në rimëkëmbjen e tij. “Duhet të presim dhe të shohim gjatë dy, tri javëve të ardhshme me Thiago, – tha Heynckes në një konferencë për media. – Por, duket mirë. Ai ka punuar dukshëm deri tani dhe tashmë mund të marrë pjesë në fillimin e seancave të trajnimit. Por, një gjë është e qartë: ai nuk do të kthehet shumë herët”.
Transferta e së shtunës në Mainz është shumë shpejt për kthimin e Thiago, por Heynckes, gjithashtu, ka shqetësime rreth Sandro Wagner dhe David Alaba, ndërsa Arturo Vidal është definitivisht jashtë. “Vidal do ta humbasë Mainzin për shkak të gripit, – shtoi Heynckes. – Sandro Wagner ndoshta do të jetë i përfshirë”.
