Ndërkohë që Spalletti po punon për të nxjerrë skuadrën nga kriza e rezultateve, në një moment kyç për kampionatin, edhe drejtuesit e tjerë të skuadrës po vijojnë të bëjnë punën e tyre. Kështu Ausilio duket se i ka gati planet e skuadrës, gjithmonë nëse zikaltrit do të kualifikohen në Champions.
Në mbrojtje pritet të vijë De Vrij, një futbollist i lirë në qershor, pasi refuzoi rinovimin me Lazion. Holandezi pritet të formojë qendrën e mbrojtjes me Skriniarin, pasi mosha e Mirandës nuk jep garanci për të luajtur titullar.
Gjithashtu pritet të paguhen edhe 35 milionë eurot për blerjen e kartonit të Cancelos, me portugezin që i ka bindur të gjithë deri tani dhe duket se është mbrojtësi që zikaltërve ju mungon prej vitesh.
Në mesin e fushës gjithashtu nuk priten shumë ndryshime, nëse do të konfirmohet Rafinha. Krahas brazilianit, pritet të afrohet edhe Vidal, i cili nuk po rinovon kontratën me Bayernin dhe mund të vijë për një çmim të pranueshëm.
Lautaro Martinez është konfirmuar për sulmin, si përforcimi më i ri, ndërsa pjesa tjetër do të mbetet e pandryshuar, nëse nuk largohet ndonjë nga lojtarët aktualë.
