Fitorja rutinë 2-0 e Liverpool ndaj Southampton e ka lënë shumë të kënaqur trajnerin Jurgen Klopp.
Të besuarit e trajnerit gjerman nuk e kishin të vështirë të kalonin Southampton, me Firmino dhe Salah që i bënë të gjitha vetë në sulm.
“I dinim pikat e forta të Southampton dhe mënyrën se si duan të luajnë futboll, kështu që donim të mbronim mirë dhe të kundërsulmonim me shpejtësi,” shprehet Klopp për Sky Sports.
“Shënuam gola të mrekullueshëm dhe mund të kishin shënuar më shumë gola kur kishim mundësinë, por Southampton luajti mirë, me stilin e tij të lojës.
“Kjo është mënyra që ata kanë zgjedhur për të zgjidhur problemet e tyre dhe situatën në të cilën ndodhen. Mendoj se ne ishim të përsosur dhe i merituam tre pikët. Nuk pësuam gol, nuk u dëmtua asnjë nga lojtarët. Ishte thuajse e përsosur.”
Me fitoren e radhës Liverpool tani ndodhet në vend të tretë të renditjes dhe është vetëm dy pikë më pak se Manchester United.
Lufta për kualifikimin në Champions League është ashpërsuar me humbjen e United, dhe tani do të jenë katër skuadra që do të luftojnë për tre vendet që të dërgojnë në Champions League.