Rreth një muaj pasi u eliminua nga çerekfinalja e Kupës së Mbretit, Real Madrid do të ndeshet me Leganes me synimin e hakmarrjes. Vendasit shkojnë në këtë takim pasi kanë pësuar dy humbje radhazi. Skuadra e drejtuar nga Asier Garitano ka marrë vetëm pesë pikë në pesë ndeshjet e fundit të kampionatit dhe ka zbritur në vendin e 12-të me 29 pikë. Udhëtimi i Real Madrid në “Butarque Stadium” vjen pas fitores 3-1 ndaj Paris SG në Champions League dhe suksesit me përmbysje në La Liga, ku humbjen e pjesës së parë, 2-1 ndaj Betis, e ktheu në fitore 5-3.
Forma e Real ka njohur ngritje në ndeshjet e fundit me 13 pikë të marra në pesë ndeshjet e fundit të La Liga, si rrjedhojë e 4 fitoreve dhe një barazimi të ardhur me 23 gola të shënuar
Faktikisht, të besuarve të Zinedine Zidane do t’i mjaftonte një barazim për të arritur Valencian e vendit të tretë. Asnjë nga pesë përballjet e fundit mes këtyre dy ekipeve nuk është mbyllur në barazim me Real Madrid që ka fituar pesë ndeshje dhe Leganes një ndeshje. Talenti i Real Madrid, Marcos Asensio, pritet të luajë si titullar pasi ka treguar një formë shumë të mirë në ndeshjet e fundit me tre gola të shënuar në dy takimet e fundit që ka luajtur.
Në këtë sezon të La Liga, Asensio numëron gjashtë gola dhe katër asiste. Nga ana tjetër te Leganes do të kthehet Dimitrios Siovas, pasi qendërmbrojtësi ishte i skualifikuar në ndeshjen e fundit të humbur 1-0 ndaj Eibar. Asnjë ekip tjetër në kampionatin spanjoll nuk ka shënuar më pak gola se Leganes gjatë pjesës së parë, vetëm 4 gjatë gjithë edicionit. Real Madrid ka pësuar të paktën një gol në 8 ndeshjet e fundit të luajtura në La Liga, 15 gjithsej.