Kombëtarja U-19 e drejtuar nga trajneri Erjon Bogdani ka humbur në finalen e turneut “Roma Caput Mundi 2018”, në ndeshjen e luajtur sot në stadiumin Anco Marzio-Ostia (Romë).
Të rinjtë e përfaqësueses kuqezi kanë zhvilluar një ndeshje të mirë përballë moshatarëve të tyre, por pa mundur të gjejnë golin e fitores, koha e rregullt përfundoi me rezultatin e barabartë 0-0.
Sipas rregullores së këtij turneu që zhvillohet ne kryeqytetin e Italisë, pas kohës së rregullt janë ekzekutuar penalltitë dhe jemi mundur me rezultatin 4-3 nga Rumania U-19. Nga pika e bardhë për Shqipërinë U-19, shënuan Pashaj, Blackori dhe Gkertsos.
Të rinjtë e Kombëtares luajtën me këtë formacion: Ismajlgeci, Isufi, Syla, Celhaka, Tuci, Gkertsos, Blackori, Lekaj, Marku, Veriu dhe Tafa (c).
Kjo ishte ecuria e Shqipërisë në turneun e përvitshëm “Roma Caput Mundi 2018” ku duhet vlerësuar paraqitja e ekipit dhe fryma në grup, ndonëse ishin shumë pranë trofeut dhe nuk mundëm të përsëritnim të njëjtin sukses sikurse vitin e kaluar.
Rezultatet e kuqezinjve:
Shqipëri 5-1 Maltë
Shqipëri 2-0 Greqi
C.R Lazio 1-2 Shqipëri
Finalja e Turneut: Shqipëri 0-0 Rumani (3-4 penallti)
