Shqipëria U19 nuk di të ndalet, pasi sot ka mundur 2-0 përfaqësuesen e Greqisë U19 në turneun “Roma Caput Mundi” që po zhvillohet në Itali. Golat për kombëtaren e të vegjëlve u shënuan nga Samuel Nezha dhe Patrik Pasha. Formacioni që u hodh në fushë nga Bogdani, përbëhej nga: Ismajlgeci, Isufi, Syla, Nezha, Gkertos, Pasha, Lekaj, Pellumbi, Koci, Halili dhe Tafa.
I pranishëm në këtë takim, ishte edhe tekniku i kombëtares A, Kristian Panuçi, i cili ka menduar të vëzhgojë edhe talentet e U19 për të monitoruar emra të cilët ai i sheh se kanë të ardhme në përfaqësueset kuqezi.
Ditën e djeshme, ekipi i drejtuar nga Erjon Bogdani, ka shkatërruar Maltën me rezultatin e thellë 5-1. Ndërsa pasnesër, kuqezinjtë do të luajnë përballë ekipit italian C.R Lacio, ndërsa në datën 23, do të luhet finalja e këtij turneu që po zhvillohet në Itali. Shqipëria U19 është fituese në fuqi e turneut, pasi triumfoi në edicionin e një viti më parë.
