Komiteti ekzekutiv i Federatës së Futbollit u mblodh për herë të parë që pas asamblesë zgjedhore të 7 shkurtit ku Armand Duka u rikonfirmua për një tjetër mandat 4-vjeçar në krye të saj.
“Është një respekt fakti që jemi zgjedhur dhe besimi i familjes së futbollit ndaj nesh, por edhe një impenjim i madh për të ndihmuar FSHF-në, për të bërë progres. Duhet të përkushtohemi maksimalisht këto 4 vite. Në këtë përbërje të komitetit ka anëtarë me profesione të ndryshme, që na ndihmojmë”.
Duka ftoi edhe kundërshtarët e tij që të kontribuojnë në zhvillimin e futbollit në vend.
“Atmosfera parazgjedhore ka qenë e acaruar, palët kanë qenë të ndara, por tani duhet të jemi bashkë. Tani duhet të bashkohemi dhe të japim maksimumin e energjive pozitive për të çuar përpara futbollin. Na bashkon loja e futbollit dhe duhet të bashkojmë interesat dhe të ecim para. Të mos shihemi si kundërshtarë, por si alternativa”.
Në mbledhjen e parë komiteti ekzekutiv zgjodhi dy zv/presidentët Edvin Libohova dhe Lutfi Nuri si dhe u caktoi çdo anëtari të mbulojë një prej komisioneve të përhershme të federatës.
