Kamza ka humbur busullën në vitin 2018 dhe nga një skuadër me pretendime për zonën europiane tashmë ka marë të tatëpjetën dhe shihet si e rrezikuar për mbijetesën. Shifrat flasin për një skuadër të brishtë, pasi në 13 takimet e fundit në kampionat skuadra e Ramazan Ndreut ka vetëm 3 fitore, 2 barazime dhe 8 humbje, duke rrëshkitur nga vendi i 3-të në të 7-in.
Pikërisht për këtë arsye sfida ndaj Partizanit shikohet si një mundësi për të ndryshuar ritmin dhe për të rigjetur dëshirën për të arritur një objektiv madhor siç është pjesëmarja në Europë. Trajneri Ndreu ka probleme në ndërtimin e formacionit pasi do të mungojë për arsye pezullimi mbrojtësi Erlis Frashëri.
Megjithatë ndalesa e kampionatit dhe periudha dy javore në dispozicion është një sinjal i mirë për trajnerin e Kamzës, që përveç problemeve fizike ka patur mundësinë të punojë në aspektin psikologjik me grupin. Këtë edicion ndaj Partizanit skuadra ka treguar paraqitje të mira, duke marë 3 pikë në dy përballje me golavarazh të barabartë, por mbi të gjitha ka bindur edhe në lojë.
Në një stadium ku gjysma e zemrës rreh për ngjyrat e kuqe, duke nisur nga simpatia e presidentit Qarri për ekipin e Partizanit, Kamza është e detyruar të ndryshojë kursin dhe të nisë rrugëtimin e pjesës së parë të sezonit. Për të siguruar sa më parë mbijetesën dhe pse jo për të tentuar surprizën, pjesëmarjen në Kupat e Europës.
