Odise Roshi do të jetë kapiteni i Kombëtares në miqësoren ndaj Norvegjisë. Nga një djalosh i rritur te Apolonia e Fierit te kapiteni i Kombëtares në moshën 26-vjecare. Por si ka evoluar karriera e Odise Roshit deri këtu?
Me Apoloninë ai luajti për 3 sezone dhe fitoi për herë të parë një ftesë nga kombëtarja e moshave. Në vitin 2009 u transferua te Flamurtari, ku fitoi edhe trofeun e tij të parë, Kupën e Shqipërisë.
Aventura e tij e parë jashtë shtetit ishte te Këlni në Gjermani. Te klubi i madh gjerman, ai nuk arriti të gjente shumë hapësira, prandaj u transferua më vonë te FSV Frankfurt, fillimisht në huazim e më pas u ble nga ky klub.
Pas një hapësire kohore me ulje dhe ngritje në këtë klub u transferua te kroatët e Rijekës.Në Kroaci, fieraku bëri një sezon mjaft të mirë dhe ra në syrin e ekipit rus të Akhmat Groznit, me të cilin luan ende.
Ndërkohë, në Kombëtaren A, Roshi luan që prej vitit 2011, dhe shumicën e takimeve i ka filluar si titullar. Me paraqitjet e tij të mira, ai ka fituar pseudonimin “Raketa”, për shkak të shpejtësisë së tij në lojë.
Të gjithë e kujtojnë asistin e tij të famshëm për Balajn, në ndeshjen e fituar ndaj Portugalisë. Golin e vetëm në Kombëtare e ka shënuar ndaj Sllovenisë, në një takim kualifikues për Kupën e Botës “Brazil 2014”, që përfundoi në fitoren 1-0 të kuqezinjve.
