Fjalët e thëna nga trajneri i Valencia-s, Marcelino, kanë qenë një reklamë e bukur për Kondogbia. “Sinqerisht, nuk i ndjek shumë mesfushorët e tjerë që grumbullohen me Francën, por në periudhën e fundit besoj se disa nga ata kanë qenë nën nivelin e Kondogbia. Kemi parë Pogba dhe Kondogbia të luajnë kundër Sevilla-s dhe nuk ka krahasim”, ka qenë deklarata e teknikut të “Los Che”.
Në mënyrë indirekte, këto fjalë kanë qenë një asist edhe për Inter-in. Mesfushori është i huazuar te Valencia, por klubi spanjoll ka të drejtën për ta blerë lojtarin në fundin e sezonit për 25 milionë euro, me Inter që do të përfitonte edhe 30% të shumës në rast se futbollisti do të shitej në të ardhmen. Një shifër e rëndësishme për arkat e klubit zikaltër, që vazhdon të jetë i limituar nga “Fair Play” Financiar.
Fjalët e Marcelino tregojnë edhe dëshirën e spanjollëve për ta blerë përfundimisht francezin, i cili po zhvillon një sezon shumë të mirë në La Liga (4 gola dhe 4 asiste në 23 ndeshje).
