Zëvendëspresidenti i Juventusit, Pavel Nedved, ka komentuar shortin e çerekfinaleve të Ligës së Kampionëve, ku bardhezinjtë do të përballen dy herë me Real Madridin. Sikurse shihet, finalja e edicionit të kaluar e këtij kompeticioni do të përsëritet tashmë më herët, në ¼ finale.
“Do të jenë dy ndeshje të mira. E dimë që përballë do të kemi Realin, i cili është një ekip shumë i mirë, – thotë ai për “Premium Sport”. – Pa diskutim, do të jenë ndeshje të vështira, por do të përpiqemi të jemi Juventusi. Në Cardiff ishte një ndeshje e thatë dhe ne u mbajtëm vetëm 45 minuta.
Këtë herë është ndryshe Kemi Benatia dhe Pjanic të skualifikuar për ndeshjen e parë dhe nuk do të jetë e lehtë, por gjithmonë e fillojmë nga 0-0. Tashmë nuk kemi vetëm një ndeshje të vetme, por dy shanse për t’u kualifikuar ndaj madrilenëve. Dybala?
Ai ka për të bërë historinë e Juventusit. Mendoj se, gjithashtu, mund të bëjë historinë e futbollit botëror. E kam parë shumë profesional dhe kjo më jep shpresë. Ai mund të përmirësohet ende”.