Pasi ka rimarrë vendin e tretë në kampionatin italian falë fitores së arritur kundër Torinos të premten e kaluar, Roma duhet të përmbysë humbjen 2-1 të pësuar në ndeshjen e parë kundër Shakhtar për të siguruar një vend në çerekfinalet e Champions League.
Trajneri Di Francesco, i cili ka folur në konferencën për shtyp në prag të ndeshjes, ka kërkuar një mentalitet të caktuar nga lojtarët e tij.
“Roma duhet të jetë shumë e vendosur, nuk është një ndeshje ku duhet menaxhuar rezultati, duhet të fitojmë. Nuk mund të rrimë në pritje, objektivi ynë i vetëm është që të dominojmë çdo ndeshje”, ka thënë tekniku i verdhekuqve.
“Ndeshja më e rëndësishme e sezonit? Jo, por kualifikimi është thelbësor për ambicien tonë. Shpresoj që Roma të mësohet duke luajtur në këto nivele”, shtoi ish-mesfushori.
Ndeshja mund të shkojë me penallti: “Jemi përgatitur edhe për këtë”, pohon numri 1 i stolit verdhekuq.
Dalja në çerekfinale është rezultati më i mirë i marrë nga Roma në Champions. “Shpresoj të bëj më mirë, është një shans i madh për mua dhe skuadrën”, ka përfunduar Di Francesco.
