“Ylli” i Bayern Munich dhe Gjermanisë, Thomas Muller, ka treguar sekretin për t’u bërë një nga futbollistët më të mirë të planetit: sakrificë, dhimbje dhe mbi të gjitha dëfrim. I piketuar nga vëzhguesit e talenteve të Bayern që kur ishte 10 vjeç, Muller është rritur në klubin bavarez dhe ka fituar gjithçka të mundshme në karrierën e tij: gjashtë tituj në Bundesligë, Kupa të Gjermanisë, një Champions Leauge dhe trofeun e Kupës së Botës në vitin 2014.
28-vjeçari është idhulli i tifozëve të Bayern dhe kur u pyet nga një fëmijë se cili është sekreti për t’u bërë futbollist i famshëm, ai u përgjigj në këtë mënyrë, me një buzëqeshje në fytyrë…
“Duhet të sakrifikosh, të heqësh dorë nga shumë gjëra dhe të vuash pak, të durosh dhimbjet e ndryshme, por mbi të gjitha të mos e humbasësh kurrë kënaqësinë për të luajtur futboll. Duhet të nxjerrësh energji pozitive sa herë e në fushën e lojës dhe më pas gjithçka është e mundur.
Që kur isha fëmijë kam qenë tifoz i Bayern dhe mbaj mend që në moshën 10 vjeç i thashë mamasë: më ço të bëj një provë në klubin e Bayern. Që nga ajo ditë kam qenë gjithmonë aty, pjesë e skuadrës që dashuroj.” Muller ka luajtur më shumë se 300 ndeshje për Bayern që kur trajneri Jurgen Klinsmann i dha mundësinë e debutimit në sezonin 2008/09.