Mbrojtësi i djathtë Ignazio Abate mund të largohet nga Milani në fund të sezonit për ta vazhduar karrierën e tij në kampionatin amerikan në MLS. 31-vjeçari nuk është një alternativë e parë në “San Siro”, sidomos pas shpërthimit të Davide Calabria. Këtë sezon ish-kapiteni ka grumbulluar vetëm 23 ndeshje me fanellën e “Djallit” në të gjitha garat.
Sipas “Radio Rossonera”, ekziston mundësia reale e ndërprerjes së kontratës së tij me pëlqimin e ndërsjellë në qershor. Ai më pas do të shkonte në Amerikë për të nisur një aventurë të re të karrierës së tij në Soccer Major League, ku para tij kanë shkuar edhe shumë italianë të tjerë si Pirlo apo Giovinco. Në të kaluarën Abate ka qenë pjesë e skuadrave si: Napoli, Piacenza, Modena, Empoli dhe Torino, ndërsa është një produkt i Akademisë së Milanit dhe u kthye në mënyrë të përhershme në vitin 2009.
