Alexis Sanchez do të jetë i vendosur të fitojë ndaj Arsenalit, të dielën, sipas bashkëlojtarit të tij te Manchester United, Phil Jones. Sanchez u largua nga Arsenali për në “Old Trafford” në merkaton e janarit, për një marrëveshje shkëmbimi, që përfshinte Henrikh Mkhitaryan.
Kiliani është ende në kërkim të formës maksimale në “Old Trafford”, sepse, pavarësisht nga një shfaqje “bërthamore” në sfidën e fundit gjysmëfinale të “FA Cup”, në fitoren ndaj Tottenhamit, ai pranon se është ende duke u përshtatur me jetën në Manchester. Por, përpara se të përballet me klubin e tij të vjetër, për herë të parë, që nga lëvizja e tij, Sanchez është “skanuar” nga Jones.
“Unë mendoj se, larg nga “Emirates”, Sanhez mund të jetë pak më ndryshe, – tha Jones për MUTV. – Duke u kthyer të luajë ndaj sh-skuadrës, ku ishte shumë i dashur, patjetër do të ketë emocione. Në shtëpi është pak më ndryshe, por ai do të ketë nxitje të shtuar për të marrë një fitore ndaj Arsenalit”.
Supersfida e fundjavës në Premier League sjell, gjithashtu, herën e fundit që Arsene Wenger do të drejtojë në “Old Trafford” si trajneri i Arsenalit. Tifozët e Manchester United nuk kanë qenë gjithmonë të dashur me francezin gjatë viteve.
Edhe pse rivaliteti i tyre është ndezur gjatë viteve, Jones ka bërë thirrje për tifozët e “Old Trafford”, që të tregojnë respektin që Wenger e meriton, të dielën. “Ai ka qenë një trajner fantastik, – tha Jones. – Në këtë moment kam parë shumë gjëra në shtyp dhe është e vërtetë. Ai ndryshoi ndeshjen e futbollit dhe mënyrën se si luajnë ekipet. Arsene duhet të respektohet dhe të marrë shpërblimin që meriton”.