Chelsea është gati të sakrifikojë Eden Hazard, duke i propozuar një shkëmbim të bujshëm Real Madridit me Gareth Bale. “Blutë” janë të dëshpëruar për të fituar garën me Tottenham për të marrë uellsianin.
Sipas shtypit spanjoll, Roman Abramovich, e ka vënë blerjen e Bale në krye të objektivave të merkatos.
Chelsea ka pasur një sezon zhgënjyes në mbrojtjen e titullit dhe renditet në vendin e pestë të Premier League, me plot 24 pikë disavantazh ndaj Manchester City kryesues.
“Don Balon” tregon se Chelsea i druhet faktit se Real do ta çojë Bale te Tottenham, për të pasur një mundësi për blerjen e Harry Kane.
Kësisoj, Abramovich mendon se Hazard duhet të sakrifikohet pavarësisht se ka bërë një sezon të mirë me 16 gola dhe 11 asiste.
Belgu nuk e ka fshehur kurrë dëshirën për të shkuar te “Los Blancos” dhe 27-vjeçari është i preferuari i Cristiano Ronaldo.