Lukas Cardozo, sulmuesi i marrë nga Partizani në merkaton e janarit, do t’u mungojë të kuqve për sprintin final të sezonit dhe me shumë mundësi edhe 2 muajt e parë të kampionatit të ardhshëm.
Vizitat mjekësore konfirmuan dëmtimin e rëndë në ligamentin e gjurit dhe faktin që lojtari po mendon ti nënshtrohet ndërhyrjes kirurgjikale. Madje, në bisedat me drejtuesit e klubit dhe me stafin mjekësor, Lucas Cordozo i ka bërë të ditur se dëshiron që operacionin ta bëjë jashtë Shqipërisë, i asistuar nga menaxheri i tij.
Dëmtimi i brazilianit është i ngjashëm me atë të mbrojtësit Arbnor Fejzullahi, që u dëmtua në fillim të tetorit të kaluar dhe vetëm prej pak javësh është rikuperuar plotësisht, duke u stërvitur me skuadrën, edhe pse trajneri Dalipi ka vendosur që ende të mos e aktivizojë në ndeshjet e Partizanit.
Një humbje e madhe për të kuqtë, duke nisur nga fakti që në gjashtë javët e mbetura të kampionatit, skuadra e Klevis Dalipit synon ta mbyllë mes tre të parave, për të siguruar pjesëmarrjen në Europa League, pa pritur verdiktin e finales së Kupës.
