Roma do të përballet sot me Barcelonën, në sfidën e vlefshme për çerekfinalet e Champions League, teksa do të synojë përmbysjen e rezultatit 4-1, të shënuar në takimin e parë.
Ndonëse duket e pamundur, trajneri Di Francesco duket se nuk ka ndërmend të dorëzohet, pa zbritur më parë në fushë, teksa thekson se me besim dhe pak fat, verdhekuqtë mund t’ia dalin.
Për të motivuar akoma më shumë futbollistët e Romës, mbrëmjen e të hënës në qendrën e grumbullimit të skuadrës ka mbërritur edhe një ish futbollist i kryeqytetasve.
Bëhet fjalë për fantazistin italian Antonio Cassano, i cili shkëlqimin fillestar e njohu pikërisht me fanellën e Romës dhe të hënë në mbrëmje u pa nën shoqërinë e Tottit, Di Francescos, por edhe futbollistëve të tjerë të verdhekuqve.
