Pep Guardiola pret që Leroy Sane të bëhet një futbollist edhe më i mirë sesa është aktualisht. Sulmuesi Sane u shpall futbollisti i ri më i mirë i sezonit në Premier League teksa dha një ndihmesë të madhe për ekipin e Manchester City që u shpall kampion i Anglisë.
Gjithsesi, trajneri spanjoll mendon se pavarësisht nga niveli i lartë që ka arritur 22-vjeçari gjerman, ai mund të përmirësohet më tej në të ardhmen, ashtu si ka bërë Raheem Sterling.
Guardiola tha: “Kryesorja është që Leroy të ketë qëndrueshmëri gjatë ndeshjes. Një futbollist i ri, ose dy lojtarë të rinj mund të luajnë mirë për një periudhë të shkurtër, por kur e bëjnë në shumë ndeshje radhazi, atëherë është e shkëlqyer. Cilësia e tij nuk vihet në diskutim, i duhet vazhdimësi.”
Më pas, trajneri i City shtoi: “Sane ka arritur një nivel të kënaqshëm, por në të ardhmen ndoshta do të bëhet më i mirë dhe mund të krahasohet me Giggs. E bukura është se Sane dhe Sterling nuk kanë mbushur 24 vjeç dhe kjo më bën shumë entizuast për të ardhmen.”