Shënoi golin e parë në Premier League, Joao Mario ka një mesazh për Interin

Fantazisti portugez, Joao Mario la Interin në janar për t’iu bashkuar West Hamit në Premier League, për të gjetur më shumë hapësira në prag të kampionatit botëror ‘Rusi 2018. Ish numri 10 i zikaltërve gjeti edhe golin e parë me anglezët të shtunën, teksa ndëshkoi kundërshtarët me një goditje mjaft të bukur nga distanca.Paraqitjet e tij deri tani kanë qenë bindëse, por e ardhmja e portugezit mbetet ende për t’u vendosur, pasi kartoni i tij është ende në pronësi të Interit dhe zikaltrit vështirë se do të hiqnin dorë pa 35 milionë euro, pasi kanë paguar 42 për ta marrë nga Sportingu.

Nga ana tjetër, trajneri i West Hamit ka deklaruar se ende nuk është vendosur asgjë mbi të ardhmen e tij dhe nëse do të tentohet blerja përfundimtare apo jo. Gjithsesi, vetë Joao Mario i ka idetë e qarta, pasi ka deklaruar për mediat angleze se me zikaltrit e ka mbyllur dhe se nuk dëshiron të kthehet më në Milano.

“E ardhmja? Dua të shoh përpara. Me Interin e kam mbyllur dhe nuk dua të bëj më asnjë hap pas. Do të më pëlqente të vijoja të Ëest Hami, por është diçka që nuk varet vetëm nga unë”, deklaroi portugezi.

Joao Mario iu bashkua Interit në verën e 2016-ës, si kampion i freskët i Europës, me Portugalinë, ndërsa ndonëse zikaltrit shpenzuan plot 42 milionë euro për kartonin e tij, fantazisti për asnjë moment nuk arriti të shndërrohej në një titullar fiks, duke treguar luhatje të shumta të formës, nga një ndeshje në tjetrën.