Gjatë ditëve të kaluara përjashtimi i Radja Nainggolan nga lista e të grumbulluarve për Botërorin Rusi 2018, ka shkaktuar polemika të mëdha në Belgjikë, ku shumë tifozë kërkonin thirrjen e mesfushorit të Romës, teksa ky i fundit vendosi në fund që të tërhiqej nga kombëtarja.
“Është një nga lojtarët më të mirë në botë. Arsyeja është taktike, – ka shpjeguar trajneri i Belgjikës, Roberto Martinez, pas shpalljes së listës -. Në dy vitet e fundit skuadra ka punuar në një mënyrë specifike. E dimë që ka një rol të rëndësishëm në klubin e tij, por nuk t’ia japim një të tillë në skuadrën tonë”.
Gjithsesi, ‘Djajtë e kuq’ do të nisen drejt Rusisë më datën 13 korrik dhe në fakt, në një farë mënyre, edhe “Ninja” do të fluturojë së bashku me të duke qenë se – sipas raportimeve të medias belge – në avionin që do të shoqërojë skuadrën e Roberto Martinezit janë prezente disa foto ku shfaqet edhe romanisti plangprishës.
Një situatë vërtetë e çuditshme, që në fakt është kthyer në qendër të vëmendjes edhe për shkak të vetë Nainggolan-it, i cili nuk ka humbur rastin për të thumbuar drejtuesit e kombëtares nëpërmjet një postimi në profilin e tij në Instagram: në foton e postuar nga lojtari shfaqej një poster gjigant në brendësi të aeroplanit, që tregonte lojtarët e Belgjikës duke festuar pikërisht pas një goli të mesfushorit: “A e gjeni dot se kush ka shënuar gol? Mendoj se dikush duhet ta ndërrojë vendin e tij, – komenton jo pa ironi Radja -. Ja avioni që do të shkojë në Rusi…”
