Një ndjesi e çuditshme, “alienizimi”. Sepse këtë herë Lacio nuk do mundet të reagojë. E megjithatë, gjatë këtij sezoni e ka bërë gjithmonë, duke u ngritur edhe në momentet e vështirësisë. Tani gjithçka ka mbaruar, Liga e Kampioneve është “venitur”, si në 2011-ën (në atë rast për diferencë golash) dhe në 2012-ën (për 2 pikë).
Për të certifikuar fundin e një sezoni të shkëlqyer, Stefan De Vraj u ka ofruar shokëve darkën në një restorant me famë të qytetit (prezent stafi dhe shumë lojtarë, si Felipe Anderson, Luiz Felipe e Uollas). Lotët e tij, në fund të ndeshjes, përmbledhin dëshpërimin për mbylljen e kampionatit.
Sepse tifozët, lojtarët, trajneri i klubit roman, mendojnë se Lacio e meritonte kualifikimin në Champions. Por, fati i keq donte që ai të shkaktonte një penallti kundër ekipit të tij të ardhshëm dhe kjo nuk kaloi në heshtje.
LULIÇ- Mbrojtësi holandez të dielën shkaktoi faullin e penalltisë që i dha mundësi Interit të barazonte rezultatin (2- 2). “Zhvilloi një ndeshje të madhe, – është shprehur kapiteni Luliç.
– Është një shembull për të gjithë. Ishte shumë i hidhëruar për gabimin e penalltisë, por luftoi deri në fund me ne”. Gjatë darkës, morali i lojtarëve ishte përtokë, por skuadra dëshiroi të qëndronte e bashkuar deri në fund. Për të rinisur së bashku vitin e ardhshëm. Edhe pa De Vrajn.
MASAKROHET- Nëse shokët e kanë falur për atë gabim, tifozët nuk falin. Në rrjetet sociale e kanë masakruar dhe e kanë quajtur tradhtar. Disa foto të montuara në rrjet e tregojnë edhe duke festuar në dhomën e zhveshjes së Interit.
Shumë tifozë mendojnë se ai e shkaktoi qëllimisht penalltinë, ndërsa të tjerë thonë se gaboi Lacio që e aktivizoi.
