Ish-sulmuesi i Real Madridit, braziliani Ronaldo, e cilësoi Mohamed Salah si “të pabesueshëm”, duke e krahasuar yllin e Liverpool me Lionel Messin. Salah, 25 vjeç, luajti këtë sezon me “Reds” dhe shënoi 44 gola në të gjitha garat, në fushatën e tij të parë me gjigandët e Premier League.
Forma e egjiptianit ndërkombëtar është e rëndësishme, në qoftë se Liverpool do ta mposhtë Real Madridin në finalen e Ligës së Kampionëve, në Kiev, të shtunën. Braziliani i madh, Ronaldo, ka qenë i impresionuar nga Salah, duke thënë se sulmuesi në fjalë ishte i ngjashëm me superstarin e Barcelonës, Leo Messi.
“Salah, e dua atë, sepse është një lojtar i pabesueshëm, me një cilësi të jashtëzakonshme, – tha “Fenomeni” për “El Partidazo de COPE”. – Ai duket si Messi. Kohët e fundit kam lexuar se unë kam qenë frymëzimi i tij dhe kam mbetur i ngazëllyer”.
Pavarësisht nga performancat e Salah, Real Madridi është favoriti për finalen e Ligës së Kampionëve, pasi kërkon ta fitojë kurorën për herë të tretë radhazi dhe të katërt në pesë sezone.
Ronaldo beson se klubi i tij i mëparshëm do ta kapërcejë Liverpool me një ndeshje të nivelit të lartë:
“Nëse Real Madridi fiton finalen e Kievit, do të jetë një ngjarje e pashembullt në historinë e tij. Jam shumë optimist. Kishte dyshime gjatë këtij sezoni, por Real Madridi u bashkua dhe ka arritur diçka historike”.
