Erdhi gjashtë muaj, u bë titullar dhe për herë të parë në karrierën e tij të gjatë arriti me një ekip shqiptar atë që nuk e kishte ëndërruar as në Greqi. Portieri 36-vjeçar grek, Kristos Athanasopulos, është përshëndetur me Luftëtarin, duke i dhënë fund karrierës së tij në mënyrën më të mirë të mundshme, teksa u fut në histori si greku i parë që luan në Shqipëri dhe për më tepër jep një kontribut të rëndësishëm në kualifikimin e bluzinjve në Europë.
“Panorama Sport” mëson ekskluzivisht se Athanasopulos do të ndjekë kursin për trajner portierësh në Federatën Greke dhe bashkëpunimi i tij me Luftëtarin mbaroi këtu. “Faleminderit Luftëtar! Falemindërit Gjirokastër! Kalova gjashtë muaj të paharrueshëm dhe ndihem mirë që ndihmova skuadrën për të shkuar në Europë”. Ky ka qenë mesazhi i grekut, që dje në mbrëmje ka darkuar me skuadrën dhe sot ka udhëtuar drejt Janinës, vetëm 60 kilometra nga qyteti i Gjirokastrës.
