Ish-kapiteni, Carlos Puyol pasi ka ndjekur finalen e Champions League mbrëmjen e djeshme, i ka dërguar një mesazh Barcelonës. Legjenda blaugrane përfitoi të uronte triumfuesit e Kievit, Real Madridin ndërsa nuk e kurseu edhe një këshillë për ish-skuadrën e tij katalanase. Barcelona e mbylli sezonin me dy tituj, fitimin e Kampionatit dhe Kupës, mirëpo nuk ka arritur të triumfojë në Champions që në 2015-ën. Në mesazhin e tij, Pyol i ka këshilluar blaugranët që të reflektojnë lidhur me vendosjen e objektivave primarë.
“Përgëzime Real Madrid. Katër Champions brenda pesë viteve, gjatë periudhës më të mirë të Barcelonës në historinë e saj…. duhet të reflektojmë për objektivët parësorë”- ka shkruar 40-vjeçari në profilin e tij në “Twitter”.
Barcelona e ka fituar pesë herë trofeun më të madh të klubeve në Evropë, Champions League, gjatë sezoneve 1991–92, 2005–06, 2008–09, 2010–11 dhe të fundit në edicionin 2014–15. Aq herë sa e ka fituar edhe ylli portugez i Real Madrid, Cristiano Ronaldo, një me Manchester United dhe katër herë të tjera me gjigantët e La Ligas, të cilët mbrëmjen e djeshme regjistruan trofeun e 13-të në historinë e tyre në UCL.
Puyol e mbylli karrierën me klubin katalanas në vitin 2014-të, me të cilin ka zhvilluar 392 ndeshje dhe ka shënuar 12 gola. Ai ishte padyshim një nga lojtarët kryesorë dhe më të dashur nga tifozeria blaugrane.
Enhorabuena madridistas. 4 Champions en 5 años con uno de los mejores Barça de la historia… tenemos que reflexionar en las prioridades.
— Carles Puyol (@Carles5puyol) May 26, 2018
