Kukesi i ka mbyllur objektivat për këtë sezon, sepse ka arritur të sigurojë vendin e dytë në kampionat. Pas dy ditësh verlindorët do të luajnë në shtëpi kundër Flamurtarit. Ky takim është i veçantë për lojtarin Sindrit Guri, sepse do të luajë ndeshjen e fundit përpara tifozëve te vet.
Tashmë kartoni i tij i përket skuadrës së Ostendes dhe nuk dihet nëse 24 vjeçari do të aktivizohet apo jo kundër vlonjatëve, për të mos rrezikuar ndonjë dëmtim.
Sulmuesi shkodran e ka arritur objektivin e vet, duke firmosur me një skuadër jashtë vendit, por në anën tjetër mund të mendojë edhe për “Këpucën e Artë”. Në garë për këtë trofe është edhe sulmuesi i Skënderbeut Ali Sowe, i cili ka shënuar 21 gola, 2 më shumë se Guri.
