Drejtuesit e Bayern Munchen, janë fokusuar te përforcimi i skuadrës për sezonin e ri, edhe pse merkato është ende larg. Disa emra janë lakuar për t’u bashkuar me kampionët e Gjermanisë, mes tyre edhe Malcom de Oliveira. Presidenti i Bordeaux, Stephane Martin këmbëngul, se Malcom ende mund të ëndërrojë të bashkohet me Bayern Munchen, pavarësisht se bavarezët mohuan interesin e tyre për një marrëveshje pak kohë më parë.
21-vjeçari është duke u lidhur fort me një transferim në Bayern si një zëvendësues afatgjatë për Arjen Robben, që është 34 vjeç. Trajneri Jupp Heynckes deklaroi kohët e fundit gjatë një konference për shtyp, se klubi nuk është i interesuar të nënshkruajë me Malcom, i cili gjithashtu është i lidhur me Arsenalin dhe Tottenham. Gjithsesi presidenti i Bordeaux është i bindur, se braziliani ende mund të mbajë shpresën për t’u bashkuar me gjigandët gjermanë.
Duke folur sëbashku me Malcom në një intervistë të përbashkët me “BILD”, Martin tha: “Një mohim nga Bayern në këtë kohë do të thotë pak. Së pari, mendoj se nuk do të ishte mesazhi i duhur për lojtarët ekzistues. Së dyti, ju do të informoni klubet e tjera shumë herët për planet e ardhshme. Malcom ende mund të ëndërrojë për Bayern”.
Kur u pyetën për komentet e presidentit Stephane Martin, Malcom u përgjigj: “Pajtohem me z.Martin”. 21-vjeçari ka impresionuar për Bordeaux deri tani këtë sezon, duke shënuar nëntë gola dhe duke regjistruar gjashtë asiste në Ligue 1.
Gazeta gjermane Bild ka shkruar më parë, se agjentët e Malcom kanë rënë dakord për një marrëveshje pesëvjeçare me Bayern, por braziliani këmbëngul se nuk është në dijeni. “Nuk e di, këshilltarët e mi dhe unë nuk flasim për këtë, por nëse është e vërtetë, më bën shumë të lumtur. Bayern është një nga klubet më të mëdha në botë”, deklaroi Malcom.
