“Është e qartë që gjërat nuk funksionojnë, jemi të avashtë dhe duhet të reagojmë sa më shpejt. Situata është kritike”, ka deklaruar Valentino Rossi, piloti i Yamaha, që dje u rendit në vendin e pestë në garën e zhvilluar në pistën e Jerez. Akoma edhe më keq u paraqit shoku i tij i skuadrës Maverick Vinales, i shtati, një garë ku motori japonez u paraqit dobët dhe konfirmoi vështirësitë që ka në pistë.
“Situata është më keq nga sa mendoja, pasi shpresoja që të isha më i shpejtë në pistë. Është turp të mendosh se jemi të kënaqur me vendin e pestë, pasi dhamë maksimumin në pistë. Nëse nuk do të kishte qenë rrëzimi i tre pilotëve, do të ishim në vendin e tetë. Jemi të avashtë dhe nuk reagojmë dot, një problem që duhet ta zgjidhim sa më shpejt. Kjo është alarmante”, u shpreh Valentino Rossi.
