Thonë se “jetëgjati s’bëhet kurrë jetëshkurtër”. E kjo shprehje i shkon për shtat ish-mbrojtësit të njohur të Liverpool-it, Jose Enrique. Ish-lojtari spanjoll ka fituar betejën më të vështirën të jetës së tij. Para dy muajsh ai u diagnostifikua me një tumor të rrallë në kokë që quhej kordoma. Mjekët i patën dhënë pak shpresa.
Madje atij iu bë me dije që edhe mund të mos dilte i gjallë nga salla e operacionit. Megjithatë mori guximin dhe ashtu si në fushën e blertë, kurrsesi nuk lejoi që të cënohej jeta e tij.
Operacioni zgjati nga ora 9 e mëngjesit deri në 6 të pasdites. I rrethuar nga familjarët e tij, Enrique arriti t’ia dilte. Pas kësaj, lojtari ka reaguar duke thënë: “Arrita ta fitoj ndeshjen më të vështirë në jetën time”.