Mbrëmë, Zvicra luajti kundër Serbisë, ndeshje që përfundoi me rezultatin 2-1 në favor të helvetëve. Festa ishte legjitime jo vetëm për zvicerianët, por edhe për shqiptarët anë e mbanë botës, pasi autor të dy golave ishin Granit Xhaka dhe Xherdan Shaqiri. Të dy festuan duke bërë me duar shqiponjën dy krenare dhe kaq mjaftoi që edhe në Zvicër festa e shqiptarëve të vazhdonte deri në orët e para të mëngjesit.
Por, një lajm i hidhur vjen pikërisht nga Bazeli, teksa mësohet se një tifoz shqiptar është qëlluar me thikë nga 3-4 tifozë serbë. Raportohet se ai ishte duke festuar me flamurin kuqezi, kur ishte sulmuar nga një grup personash. Fatmirësisht i riu shqiptar ka dalë jashtë rrezikut për jetën, pasi menjëherë i është dhënë ndihma e parë nga shokët e tij, të cilët e kanë transportuar më pas në spital.
