Portugalia ka marrë një fitore të çmuar ndaj Marokut, në ndeshjen e dytë të Botërorit, falë një goli të hershëm të Cristiano Ronaldos, por e ka parë veten nën presionin e kundërshtarit gjatë gjithë lojës. Thënë ndryshe, ka qenë me fat, që tërë ato sulme dhe aksione të Marokut nuk janë konkretizuar dot.
Pas vërshëllimës së gjyqtarit, trajneri i luzitanëve, Fernando Santos, e ka pranuar ndeshjen jo të mirë të të tijve, por vlerën kryesore për të e ka fitorja: “Ishte e rëndësishme për të fituar, por duhet ta analizojmë mirë këtë ndeshje. E kemi nisur në mënyrën më të mirë, me një gol të shpejtë, por pastaj kemi humbur kontrollin dhe nuk kemi mundur ta trajtojmë lojën.
Skuadra ishte shumë statike, e vuajti presionin e kundërshtarit. Në kohë të caktuara të lojës duket se e humbnim besimin dhe filluam të rikthehemi shumë poshtë. Ne do të duhet ta korrigjojmë këtë situatë”.
