Granit Xhaka nuk i ka shpëtuar ndëshkimit të FIFA-s për veprimin e bërë në ndeshjen Zvicër- Serbi. Mesfushori shqiptar i Helvetëve ishte autor i një supergoli dhe në momentin e festës ai bëri shenjën e shqiponjës me duar duke irrituar Federatën Serbe që kërkoi dënimin e tij.
Dje, Qeveria e Futbollit Botëror dha vendimin në të cilin bëhej me dije se Xhaka duhet të paguajë një gjobë prej 10 mijë frangash. Kjo duket se nuk e ka mërzitur aspak mesfushorin e Arsenalit, i cili sot ka reaguar për herë të parë në rrjetet sociale ku shfaqet gjatë një seancë stërvitore.
Xhaka duket i lumtur dhe gati për sfidën e nesërme: “Ndihem i gëzuar dhe i relaksuar. Nesër do të bëjmë gjithçka për të siguruar kalimin në raundin tjetër”, përfundon ai.
Kujtojmë që nesër Zvicra do të përballet me Kosta Rikën në orën 20:00. “Helvetët” ndodhen në vendin e dytë me 4 pikë, aq sa dhe Brazili kryesues.
