Spanja bëri detyrën kundër Iranit. Me shumë vështirësi, por djemtë e Fernando Hierros morën 3 pikët, të cilat do ta ndihmojnë për të arritur objektivin. Ai primar është për t’u kualifikuar, ndërsa tjetri për të siguruar vendin e parë në grup. Dhe spanjollët kanë nisur të bëjnë llogaritë për ndeshjen e fundit. Në Grupin B të Botërorit ka vetëm një verdikt zyrtar: Maroku është eliminuar dhe nuk ka asnjë opsion për t’u kualifikuar në fazën e 1/8-ave.
Gjithçka tjetër duhet të vendoset. Si del Spanja e para e grupit? Si del Spanja e dyta e grupit? A ka shanse për t’u eliminuar? Por, përpara se të shpjegojmë shanset dhe mundësitë, e rëndësishme është të dimë kriteret e klasifikimit kur pikët janë të barabarta. Dhe kriteret janë në këtë rend: Golat (diferenca e golave të shënuar me ata të pësuar), golat e shënuar, më shumë pikë kundër ekipit që ke barazuar, diferenca e golave të ndeshjes mes ekipeve që kanë pikë të barabarta, më shumë gola të shënuar në ndeshjet mes ekipeve që kanë pikë të barabarta, më shumë pikë në renditjen “Fair Play”. Kështu bëhen llogaritë:
VENDI I DYTË- Kombëtarja spanjolle do të kalonte në fazën e 1/8-ave si ekipi i dytë nëse fiton me Marokun dhe Portugalia gjithashtu fiton me Iranin dhe të ketë diferencë golash më të mirë në total. Irani gjithashtu ka shanse për t’u kualifikuar nëse fitojnë kundër Portugalisë dhe Spanja barazon me Marokun. Spanja do të dilte e dyta në grup edhe në këtë rast. Por, një humbje e Spanjës me Marokun dhe një humbje e Portugalisë me Iranin gjithashtu do t’i jepte shanse Spanjës për t’u kualifikuar, por gjithmonë në bazë të golave. Diferenca duhet të jetë më e mirë sesa Portugalia.
E PARA- Ky është ekuacioni më i lehtë. Spanja do të kalonte si e para në Grupin B, nëse fitonte kundër Marokut dhe Portugalia barazonte ose humbte me Iranin. Por, nëse “furia e kuqe” do vendin e parë edhe nëse fiton Portugalia, atëherë duhet që diferenca e golave të shënuar me ata të pësuar të jetë më e mirë sesa e luzitanëve.