Që pas verdiktit të CAS-it lidhur lënien në fuqi të vendimit të UEFA-s për pezullimin me 10 vjet nga Europa dhe gjobë 1 milionë euro, në kampin korçar kanë ndodhur shumë lëvizje edhe pse shumë pak janë bërë publike.
Përveç kontratatëve të lojtarëve, një tjetër çështje madhore është ajo e trajnerit. Prej disa ditësh është folur për një kalim të mundshëm të Ilir Dajës te Flamurtari. Madje, administratori i klubit vlonjat, Sinan Idrizi ka pranuar se ka patur një takim me Dajën, por nuk zbulon asnjë detaj më shumë.
Së fundmi, zbulohet se Daja e ka vendosur të ardhmen e tij. Ai pret të takohet edhe një herë me presidentin e klubit korçar, Ardjan Takaj për të vënë pikat mbi “i”. Mundësia më e madhe ekziston që Daja të konfirmohet nga momenti në moment në krye të Flamurtarit, duke u ndarë në paqe nga Korça pas gjithë këtyre ndodhive që ndodhën së fundmi.
