Ndoshta vend për bisedime ka shumë, sepse jo me të gjithë mund të jenë të kënaqur, por loja e futbollit është një sport që kërkon shënimin e golave, të qenit i rrezikshëm te kundërshtari, klas në driblim, zemër dhe sakrificë për të vrapuar, por në fund për të ofruar edhe garanci për portën tende. Dhe në bazë të këtyre karakteristikave, duke u bazuar në të dhënat e FIFAs, në përfundim të fazës në grupe, shifrat nënvizojnë se pesë karakteristikat e sipërpërmendura korrespondojnë me pesë emra që të gjithë i njohin shumë mirë. Herri Kejn – Sulmuesi i Anglisë është golashënuesi më i mirë i turneut, pas fazës së grupeve.
Gjiganti i Totenhemit ka realizuar pesë gola, për të cilët nuk i është nevojitur ndeshja e tretë kundër Belgjikës, por i ka realizuar në 180 minutat e para, konkretisht kundër Tunizisë (2 gola) dhe Panamasë (tripletë). Prandaj, Ronaldo dhe Lukaku (4 gola) janë të paralajmëruar.
Nejmar – Ka realizuar vetëm një gol, e kërkoi të dytin me shumë egoizëm kundër Serbisë por nuk e gjeti, ndonëse pas tri ndeshjeve të para, sulmuesi brazilian meriton çmimin e “lojtarit më të rrezikshëm” për rivalët, duke qenë se ai ka krijuar 11 raste për gol, duke llogaritur brenda kësaj shifre edhe asistet për shokët e tij. Prandaj, për të gjithë kundërshtarët Nejmar është një nga ata që duhen mbajtur nën kujdes.
Lionel Mesi – Një penallti e humbur me Islandën, një gol fantastik i shënuar kundër Nigerisë… Për Lionel Mesin ndoshta kaq është shumë pak pas tri ndeshjeve të para të një Botërori, por e rëndësishme është që “pleshti” është kualifikuar për në 1/8-at, pasi rrezikoi shumë, por në të njëjtën kohë ka nisur që të rrisë ritmin e tij të lojës, duke qenë se deri në këtë fazë, është ai dribluesi më i mirë, me 20 tentativa të kompletuara.
Kristian Eriksen – Ka shumë klas në këmbët e tij, por duke qenë që shpresat e Danimarkës janë të varura të gjitha te ai, fantazisti i Totenhemit nuk kursehet duke sakrifikuar në çdo cep të fushës, aq sa për momentin është “maratonomaku” i Kupës së Botës, me 36 kilometra të përshkuar.
Guilhermo Oçoa – Ndonjëherë, pritjet e një portieri vlejnë sa golat e sulmuesve, sepse duke shmangur një top në rrjetë mund të frymëzosh shokët e tu që realizojnë. Gjithsesi, përsa i përket detyrës bazë, atë të shmangies së golave, është Oçoa portieri që garanton më shumë siguri, duke qenë se për Meksikën ka shmangur 17 gola të sigurt.