Lazio po mendon të gjejë një mesfushor të përshtatshëm për të zëvendësuar largimin e mundshëm të Sergej Milinkovic-Savic. Sipas të përditshmes italiane “Corriere dello Sport”, gjigantët e Serie A kanë menduar që të afrojnë këtë merkato vere mesfushorin e Arsenal, Aaron Ramsey. 27-vjeçari është një nga lojtarët që është pëlqyer më shunë nga Simone Inzaghi dhe shihet si zëvendësues i denjë i serbit që kërkohet nga shumë klube në botë.
Mesfushori uellsian konsiderohet si një lojtar i rëndësishëm nga bosi i ri i “Topçinjve”, Unai Emery, por Lazio mendon se mund ta ‘tundojë’ lojtarin për të nënshkruar në Serie A. Kontrata e tij me Arsenal përfundon në vitin 2019-të por ende nuk ka arritur një marrëveshje të re.
Pas largimit të Milinkovic-Savic, i cili bëri një sezon fantastik me fanellën e kryeqytetasve këtë sezon në kampionatin italian, është kërkuar nga shumë klube me emër në Evropë, si Real Madrid, Chelsea, United e të tjerë. Këta të fundit duket që hoqën dorë shpejt nga interesi për blerjen e kartonit të 23-vjeçarit. Për serbin është futur në garë edhe Juventus, por do ta ketë të vështirë pas ardhjes së Julen Lopetegui në “Santiago Bernabeu”, i cili do të bëjë çmos që të bindë lojtarin për t’u bërë pjesë e ekipit të tij.